Академиялық ортақ тарихты жазу мәселесі 2024 жылдың 6 қарашасында Бішкекте өткен Түркі мемлекеттері ұйымының XI саммитінде көтеріліп, ел басшылары мұндай ауқымды жобаны жүзеге асыруды Түркі академиясына тапсырған еді.
24 ақпанда Анкарада түркі елдерінің тарихын жазу бойынша ортақ академиялық жұмысты талқылауға арналған халықаралық сессия өтті. Оған Түркі мемлекеттері ұйымына мүше жəне бақылаушы елдердің тарих жəне археология институттарының басшылары, сондай-ақ жетекші тарихшылар мен сарапшылар қатысты. Атап айтқанда, Түркі академиясының президенті Шаһин Мұстафаев, Түркі мемлекеттері ұйымы Ақсақалдар кеңесінің төрағасы
Бинали Йылдырым, Ататүрік атындағы жоғары кеңес төрағасы Дерья Өрс жəне Түрік тарих қоғамының президенті Юксел Өзген жиын барысында өз ойларын ортаға салды.
Іс-шараның ашылуында сөз сөйлеген Түркі академиясының басшысы Шаһин Мұстафаев жобаны қолдаған барлық қатысушыға алғыс айтып, бұл бастаманың түркі əлемінің ғылыми интеграциясы үшін маңызды екенін атап өтті. «Бір ғана мемлекеттің тарихын жазу оңай шаруа емес. Ал біздің алдымызда тұтас халықтар мен мемлекеттердің ортақ тарихын жүйелеу міндеті тұр», деді ол.
Алдымен ұжымдық монографияның тұжырымдамалық негізін қалыптастырудың маңыздылығын атап өтіп, академиялық еңбектің қарапайым оқырманға, əсіресе студенттер мен жас зерттеушілерге түсінікті болуы керектігін баса айтты.
Ұжымдық монографияның басты мақсаты – түркі əлемі тарихының маңызды кезеңдерін зерттеп, бауырлас халықтардың ортақ тарихи санасын қалыптастыру, жастардың ұлттық мақтаныш сезімін нығайту жəне түркі өркениетінің бай мұрасын халықаралық деңгейде кеңінен таныту. Кездесу қорытын- дысы бойынша Түркі академиясының президенті мен тарих жəне археология институттарының басшылары түркі елдерінің тарихына арналған академиялық еңбекті бірлесіп əзірлеуді көздейтін ынтымақтастық хаттамасына қол қойды.
Ескендір ЗҰЛҚАРНАЙ
