Сұрақ: Үйленбеген жігіт ажырасқан әйелмен отау құра ала ма?
Жауап: Адам өміріндегі ең маңызды қадамдардың бірі – шаңырақ көтеріп, отбасын құру. Неке барысында заң мен дін негізіндегі шарттары орындалғаны қайырлы. Ер мен әйелдің арасында некеге қайшы келетін негіздер болмаса, үйленбеген жігіт өзінің қалауымен тұрмыста болған немесе жесір қалған қызға үйлене алады. Исламда ажырақан, жесір қалған әйелдерге қайта тұрмысқа шығуға болмайды деген талап жоқ. Мұндай некеде тұрған ешқандай күнә немесе теріс әрекет жоқ.
Шарғи некенің дұрыс болуы үшін мынадай шарттарын ескерген жөн:
Ижаб пен қабулдың (Ижаб деп – үйленгелі жатқан тараптың бірі отбасын құруға ұсынысы, ал қабул деп – екінші тараптың ұсынысына келісімін, разылығын білдіретін сөздер) бір жерде айтылуы, тараптардың бірінің сөзін екіншісі естуі, тараптардың сөздері бір-біріне қайшы келмеуі, үйленуге тыйым салынған әйелдер болмауы, екі куәгердің (екі ер кісі немесе бір ер, екі әйел) болуы, отбасын құратын қыз бала ата-анасының келісімін алуы, мәһр келісімі.
Икрам АЙТАЕВ
