Сұрақ: «Толеранттылық» ұғымын қалай түсінеміз?
Жауап: Толеранттылық – латын тілінде төзімділік, тағаттылық, көнбістік деген мағыналарын білдіреді. Яғни, басқа ойға, көзқарасқа, наным-сенімге, іс-әрекетке, әдет-ғұрыпқа, сезім-күйге, идеяларға төзімділік, жұмсақтық көрсете білу қасиеті.
Сондай-ақ, толеранттылық діни конфессиялардың алуан түрлілігін мойындауды, өзгелердің діни сеніміне қысым жасамауды және бір-бірімен бейбіт қарым-қатынаста болуды білдіреді.
Толеранттылық пен рухани келісім қағидаттары дәстүрлі діндердің бәріне тән. Дінаралық татулықты сақтауға исламда да баса мән берілген. Басқа дін өкілдерімен тату-тәтті қарым-қатынаста болу – Ислам шариғаты бұйырған іс-амалдардан саналады.
Елдің діни тұрақтылығын жою мақсатында құрылған діни топтар жалған уағызшылар өз мақсаттарына жету жолында діни мәтіндерді үзіп-кесіп, бұрмалап, орынсыз түсініктемелермен бүлік шығарып жүргені жасырын емес. Мұндай адасқан топтардан сақ болғанымыз абзал. Өз ұлтын сүю, оның тарихын, мәдениетін, салт-дәстүрін, дүниетанымын құрметтеу, өзге ұлт өкілдерінің де осындай құндылықтарына құрметпен қарау, ислами құндылықтар аясында ұлтаралық татулықты сақтауға септесу – шынайы мұсылман сипатына тән болуы керек.
Икрам АЙТАЕВ
