Мәжіліс депутаты Ринат Зайытов Мәслихат депутаттарының форумында Президент Қасым-Жомарт Тоқаевқа дәстүрлі ұлттық театр ашу, сондай-ақ мектеп бағдарламасына «Жаңа қазақ әдебиеті» пәнін енгізуді сұрады.
Тәуелсіздік алғалы бері еш ескерілмей тасада қалған ұлттың төл өнерін төрге шығаратын уақыт келді, деді ол.
«Қорқыт атамыздың қолынан түспеген қобыз, Сүйінбай сөзімен абырой-намысымызды асқақтатқан айтыс, күй атасы Құрманғазы мен Тәттімбет, Маңғыстаудан Сыр бойына дейін жыр төккен сүлейлер мен қайқылар, әлемді әнімен мойындатқан Әмірелердің мұрасы бүгінгі күні өздеріне лайық тұғырға орналаса алмай келеді.
Ұлттық дәстүр мен өнердің ордасына айналатын оңаша шаңырақ қажет. Мәселен, Қытайдағы дәстүрлі Пекин орталығы, Италиядағы Ла-скала, Қырғыз ағайынның дәстүрлі Манас орталығы өз ұлтының төл өнері мен дәстүрін сақтап, дамытып отыр. Бізге де осындай республикалық деңгейдегі ұлтымыздың ән, күй, жыр, айтыс-термесін әлемге танытатын бір дәстүрлі ұлттық театр ауадай қажет. Ол жай ғана театр емес, қазақ ұлтының рухани байлығын баршаға паш етіп, ұрпақ тәрбиесіне оң әсерін тигізетін орталық болатынына еш күмәнім жоқ», деді Ринат Заитов.
Сонымен бірге, депутат қазіргі балалар «аяз ата келіп тұр, маған сәлем беріп тұр» дегеннен аса алмай тұрғанын, олардың отаншылдық сезімін күшейту үшін мектептің 7-11 сыныптарына «Жаңа қазақ әдебиеті» пәнін енгізуді ұсынды.
