Сұрақ: Ауылда апам «басқаға қол ұшын берсең, жаман болмайсың, балам» деп жиі айтатын. Үлкен қалаға келіп, оқуға түстім. Мұнда ешкімнің бұлай айтқанын естімедім. Сонда қол ұшын ағайын адамға ғана берген дұрыс па?
Жауап: Қол ұшын беру – игі іс жасау амалдарының қатарына жатады. Құдай Тағала: «Қандайда болмасын игілікті іс жасасаңдар, Алла бәрін білуші», – деп әмір қылған. Сол үшін мұсылман баласы қандай да болсын жақсылық жасауға әзір тұрады.
Сонымен қатар, қол ұшын беру дегеніміз қаржылай яғни материалдық демеу ғана емес, моральдық, психологиялық демеудің барлығын қамтиды. Тіпті, басқаның айыбын жасырып немесе қайғысына ортақтасса да қол ұшын берген саналмақ.
Ал енді Әбу Һурайрадан (р.а.) жеткізген хадисте: «Пайғамбар (оған Алланың салауаты мен сәлемі болсын): «Кімде-кім мүмін бауырының осы дүниедегі бір уайым-қайғыдан құтылуына себепкер болса, Алла оны қиямет қайымның қайғы-мұңдарының бірінен құтқарады. Кім қарызданып қысылған адамға түсіністікпен қарап, ісін жеңілдетсе, Алла оның ісін екі дүниеде де жеңілдетеді. Кім мұсылман бауырының айыбын жасырса, Алла екі дүниеде де оның айыбын жасырады. Сондай-ақ, Алланың құлы мұсылман бауырына жәрдем етуін тоқтатпайынша, Алла да құлына жәрдем етуін тоқтатпайды» деген екен.
Жалғас САДУАХАСҰЛЫ
