Шешенстан парламенті республика басшысы лауазымының атауын өзгерту туралы бастама көтерді. Заң шығару органының сайтында “Шешенстан Республикасы Конституциясына өзгерістер енгізу туралы” заң жобасы жарияланды.
Құжатта республика басшысының лауазымына “Мехкан Да” сөздерін қосу ұсынылған. Ол шешен тілінен “ел әкесі” немесе “ел басшысы” деп аударылады. Орта ғасырларда жалпыхалықтық құрылтайларда ең беделді ақсақалдар қатарынан сайланған шешен халқының көшбасшыларын осылай атаған.
Бұл бастаманы 20 депутат көтеріп отыр, солардың бірі – республика парламентінің төрағасы Магомед Даудов.
Айта кетейік, бұған дейін Татарстан президенті республика басшысын “Татарстан Республикасының басшы-райысы” деп атау туралы заңға қол қойған болатын.
