Біріккен Араб Әмірліктерінде мешіт, шіркеу және синагогадан тұратын жаңа кешен ашылды. “Ибраһим отбасының үйі” деп аталатын ол Әбу-Дабидің Саадият мәдени ауданында орналасқан.
Қазіргі күні оған тек құлшылық жасау үшін ғана кіруге болады, ал 1 наурыздан бастап туристерге де есігін айқара ашпақ.
Ел басшыларының ойына мұндай кешенді тұрғызу 2019 жылы келген болатын. Сол жылды олар “Толеранттылық жылы” деп атап өткен болатын.
Ішіне күн сәулесі еркін түсетін қылып жасалған ғимараттың сәулетшісі – британдық шебер Дэвид Аджайе. “Осындай ғимараттардың арқасында қоғамдағы түрлі дін мен тап өкілдері болашақ үшін бірге өмір сүруді үйренеді деп ойлаймын”, – дейді ол.
Кешеннің ішінде 3 құлшылық бөлмесі бар. Көлемдері бірдей. Әрқайсында ағылшынша, арабша және ивритше жазулар бар.
Айта кетсек, кешендегі синагога бөлмесі – Біріккен Араб Әмірліктеріндегі еврейлердің тұңғыш құлшылық үйі.
