Маңғыстау облысы Дін істері басқармасының мемлекеттік әлеуметтік тапсырысы аясында 2022 жылдың 15 мамыр күні әйел жамағаты арасында күні «Діни радикалдану – қоғамға қауіпті құбылыс» тақырыбында семинар өтті.
Семинарды республикалық ақпараттық-түсіндіру тобының мүшесі, «Отпан» Ақпараттық-түсіндіру және оңалту орталығының директоры Азамат Нұғманұлы Төлепов жүргізді.
Бүгінде «діни радикализм» сөз тіркесі әлі де күн тәртібінен түспей тұр. Соңғы жылдары еліміздегі діни ахуал тұрақталып, бір қалыпқа келгенімен, деструктивті діни идеологиялар таралып жатқан жоқ деп айтуға ертерек. Өйткені, теріс ағымды насихаттаушылар бұрынғыдай көзге түсіп көшеде әрекет етуден гөрі, заман талабына сәйкес виртуалды әлемде жасырын белсенділіктерін арттырған.
Ең қауіпті радикалды топ деп тәкфир жамағатын айта аламыз. Жамағатының басты қаупі – көзқарастарының ата-бабамыз жүрген және Қазақстан мұсылмандары діни басқармасы ұстанатын діни бағытпен сәйкес келмеуінде, яғни мәзһаб ұстанбауында және өздерінің жолын дұрыс деп танымаған, келіспеген азаматтарды айыптауында, оларды адасқанға шығарып, бидғатшы, тіпті кәпір деп баға берулерінде.
Сонымен қатар, дін басшыларын өз саласындағы құзырлы билік ретінде мойындамай, оларға бағыну міндетті емес деп, қарсы шығулары да бүліктің басы болып есептеледі.
Мысалы, сәләфизм ағымының негізін салушы Мұхаммед ибн Абдулуаххабтың «Науақидул ислам» («Исламды бұзатын амалдар») атты кітабы бар. Егер осы еңбекті енді дінге келген, намазды бастап жатқан, діни сауаты аз адам оқыса, үлкен адасушылыққа тап болады.
Ол жерде жазылған радикалды көзқарастарды бойына сіңірген жан тіпті қоршаған ортасын жек көріп кетуі мүмкін. Басқалардың барлығын дінсіздікпен айыптайтын радикалдар осылардың арасынан шығады. Бұған ел-жұрттан бөлініп, қазақтың бәрін кәпірге санап, Сирияға соғысқа кеткендерді мысалға келтірсе болады.
