“Рамазан – адамдарға тура жол нұсқаушы, ақ пен қараны айырушы, бекем тұтынатын жолбасшы ретiнде Құран түсiрiле бастаған ай. Рамазан айы туғанын көрген адам бiрден ораза ұстайтын болсын. Егер бiреулер ауру болып, әйтпесе жол сапарда жүрсе, онда басқа күндерде өтесiн. Алла сендерге жеңiлдiк болуын қалайды, ауырлық түсiргiсi келмейдi.” деген “Бақара” сүресi, 185-аяты көңілі ояу, дінге берік әрбір мұсылманға аян.

ҚМДБ және Орта Азия мүфтилер кеңесінің төрағасы, Бас мүфти, шейх Әбсаттар қажы Дербісәлінің Рамазан айына байланысты үндеуі Алакөл өңірінің топырағынан май, шөбінен бал тамған қасиетті де берекелі Жыланды ауылының тұрғындары арасында кеңінен таныстырылып, үндеуге әрбір мұсылман пенде өз үлесін қосуға дайын екендігін білдірді.

Мұсылман үшін отыз күн ораза ұстау ұлық ғибадат. Бұл күндерде ораза ұстаумен қатар, мұқтаж жандарға қайырымдылық жасау да Алла құзырындағы сауабы мол амалға жатады.

«Тау баурайына орналасқан Жыланды

Талай кірпіш өзіңнен нәр алып қаланды.

Шөбі шүйгін, егіні мол, саялы алма бағы.

Шөліңді қандырып, бал бұлағы ашқан сарайды» деп жырыма қосқан Жыланды ауылының аудан, облыс көлеміне аты әйгілі біртуар нарқасқа азаматы Оспанов Бауыржан, Абдрахманов Қайыржан қасиетті Рамазан айында игі істер жасауды әдетке айналдырған. Еліміз Егемендігін алып, туған жерге, отанға, елге деген сүйіспеншілік – терең иманнан туындайтын сезім екенін ту еткен аптал азаматтар бірнеше жылдан бері ауыл тұрғындарына қайырымдылық көрсетіп мал сойып, хатым шығарып, Аллаһ үйі мешітте қадір түнін ұлықтау әдетке айналған. Пайғамбарымыздың «Отанды сүю-имандылықтан басталады»-деген өсиетін Жыланды халқы әруақытта басшылыққа ала отырып болашақ ұрпаққа саналы тәрбие беруде игі істер атқарылуда. Оның айғағы ауыл әкімшілігінің ұйымдастыруыменен мешіт ауласына ақ жапқан 12-қанатты қазақ үйі тігіліп, кешкісін ауыз ашар берілуде.

Қасиетті Рамазан айында Алла тағаланың ашуымен қаһарын тудыруға себепті арақ-шараптан аулақ болу да Жыланды  ауылында дәстүрге айналып бірнеше жылдан бері ораза кезінде дүкендерде арақ саудасы мүлдем тоқтатылды. Сонымен бірге ауылдағы дүкен иелері әрқайсысы тұрмысы нашар, отбасына көп балалы жанұяларға тамақпен көмектесу игі істер жасау арқылы үндеуге қолдау көрсетті.

Құрметті мұсылман бауырлар Қасиетті Рамазан айы құтты болып, ұстаған оразаларыңыз қабыл болсын!

Ізгі ниетпен Әлібекова Роза Тыныбайқызы. Жыланды қазақ орта мектебі Ұлағатты ұстаз.

 

 

Пікір жазу