Сұрақ: Ислам дінінің қоғамдағы қызметі қандай?
Жауап: Дәстүрлі діндердің қағидасы – қоғамда бейбітшілік пен татуылықты сақтау. Ислам діні ғасырлар бойы әділдігімен, бейбітшілігімен халықтың рухани өмірінен орын тапқан.
Негізі дін мемлекеттің ісіне араласып, саясиланбайды. Егер шектен тыс діни қағидаларға бой алдырып, саясиланып кетсе, дін сипатын жоғалтады. Мұндай ұстанымдағы діни ағымдар алауыздыққа бейім болады.
Дәстүрлі Ислам тағылымы адамдарды мейірімділік, жақсылық жасауға тәрбиелеуді, адам өмірінің мәнін, жақсылық пен жамандық өлшемін, ортақ сенім мен құндылықтар арқылы адамдарды бірлікке шақыруды, ұрпаққа рухани – мәдени құндылықтарды жеткізуге ықпал етуді насихаттайды.
Сонымен, қайырымдылыққа, мұқтаж адамдарға көмек көрсету мен қоғамдық қолдау сияқты істерге ынталандырады, қиын кезеңдерде адамға үміт, жұбаныш және рухани қолдау береді, салт-дәстүр мен тархи мұраның дамуына әсер етеді.
Сондай-ақ, зайырлы қоғамда дін мен мемлекет қызметінің шекарасы сақталады. Әр адам өз дінін еркін ұстануға еркіндік береді. Демек, дін қоғамда тек сенім, құлшылық ретінде емес, адамның мінез-құлқына, мәдениетке және әлеуметтік байланыстарға ықпал ететін институт ретінде қызмет етеді екен.
Икрам АЙТАЕВ
