19-20 қыркүйек күндері Алматы қаласында Қазақстан мұсылмандары діни басқармасының ұйымдастыруымен «QMDB EXPO-2026» халықаралық көрмесі өтеді.
«QMDB EXPO-2026» – Қазақстан мұсылмандары діни басқармасының негізгі қызмет бағыттарын, мекемелері мен жобаларын, сондай-ақ отандық және шетелдік халал индустрия өкілдерін бір алаңға тоғыстыратын ауқымды шара.
Көрменің басты мақсаты – ҚМДБ-ның рухани-ағартушылық, қайырымдылық, ақпараттық, баспа, қажылық, халал индустриясы, уақып, цифрландыру және әлеуметтік бағыттардағы қызметін қоғамға кеңінен таныстыру, жаңа жобалар мен бастамаларды көпшілік назарына ұсыну. Сонымен қатар көрме халал индустриясының дамуына серпін беріп, отандық және шетелдік кәсіпкерлер арасында тәжірибе алмасуға, іскерлік байланысты нығайтуға мүмкіндік береді.
Көрмеге ҚМДБ-ға қарасты «Халал Даму» стандарттау және сертификаттау орталығы, «Зекет және қайырымдылық» қоры, «Мүфтият» баспасы, «Мұнара» телеарнасы, «Тауаф Тревел» қажылық компаниясы, «Иман» журналы, «Мұнара» газеті, «Уақып» қоры, «Қамқор-Шарапат» орталығы, «Дархан Дала» жобасы және өзге де мекемелер қатысады. Әр мекеме өзінің атқарып жатқан жұмысын, жаңа жобалары мен қызметтерін арнайы көрме алаңдарында таныстырады.
«QMDB EXPO-2026» көрмесінің маңызды бағыттарының бірі – цифрландыру мен заманауи технологиялар. Көрме барысында ҚМДБ қызметіне енгізіліп жатқан цифрлық жобалар мен технологиялық шешімдер таныстырылып, дін саласындағы цифрландырудың жаңа мүмкіндіктері ұсынылады.
Көрменің тағы бір ауқымды бөлігі халал индустриясына арналады. Мұнда Қазақстанның ірі кәсіпорындарымен қатар шетелдік өндірушілер өз өнімдерін ұсынады.
Атап айтқанда, Өзбекстаннан Craffers, Alif, ASL CORN, Tanho, PUFFI, ARDENT FOODS, ISKO, Candy Gold, Boost Food, Қырғызстаннан «Куликов», «Тойбосс», Қытайдан Wedrink компаниялары қатысады.
Отандық өндірушілер қатарында Arai East Food, «Эмиль», Zigi-Zagi, «Кублей», «Нәрлен», Happy Cake, Lalu Cake, «ҰЛАН», «Ленгерское», «Бижан», «Алель Агро», «Алатау Құс» және басқа да кәсіпорындар бар.
Келушілер көрме барысында ет және құс өнімдері, сүт өнімдері, кондитерлік өнімдер, сусындар, жартылай фабрикаттар, тағам қоспалары және басқа да халал өнімдердің кең ассортиментімен таныса алады. Өнімдерді өндірушілерден тікелей сатып алуға мүмкіндік қарастырылған.
Бұдан бөлек, екі күн бойы рухани-ағартушылық кездесулер, мазмұнды сұхбаттар, арнайы таныстырылымдар мен түрлі іс-шаралар ұйымдастырылады.
Көрменің өтетін уақыты:
19-20 қыркүйек 2026 жыл, сағат 09:00-18:00.
Өтетін орны: Алматы қаласы, Тимирязев көшесі, 42, «Бақшасарай» салтанат сарайы.
Кіру тегін
