Сұрақ: Исламда сөз бостандығы бар ма?
Жауап: Алланың адамға берген нығметтерінің бірі – сөз сөйлеу. Адамдар арасында жақсы сөз сөйлеу арқылы қарым-қатынас артады. Жаман сөз арқылы қарым-қатынас жоғалады.
Исламда сөз айту еркіндігінің өзіндік орны бар. Адам өз ойын айтуға құқылығы, айтатын сөзі әділдікке, шындыққа және басқа адамдардың ар-намысы мен құқығына зиян келтірмеуі керек. Сонымен, сөз еркіндігі деп біреудің ар-ұжданы мен діни сенім бостандығын сақтамай немесе ақыл-парасаты жетпейтін дүниелерді талдап кету дұрыс емес.
Сондай-ақ, қазіргі таңдағы мәселенің бірі – әлеуметтік желілерде жазылатын әрбір сөз бен пікір. Интернет кеңістігіндегі айтылған немесе жазылған жағымсыз сөз бен пікірге жауапкершілік бар екенін білгеніміз дұрыс.
Жақсы сөздің хикметі жайлы хадистер мен мақалдарда кең баяндалған. Пайғамбарымыз (с.а.у.) хадисінде: «Кімде-кім Аллаға және ақырет күніне иман келтірсе, жақсы сөз сөйлесін немесе үндемесін» десе, тағы бір хадисінде: «Мұсылман – өзге біреуге қолымен және тілімен зиян тигізбеген адам», деген.
Демек, «Жақсы сөз – жарым ырыс» демекші, жақсы сөз айтып, жаман сөз бен пікірден сақтанып, жақсылыққа жете берейік.
Икрам АЙТАЕВ
