Сұрақ: Қажылық жасау міндет пе?
Жауап: Ислам дінінде шамасы жеткен әр мұсылманға қажылық ғибадаты парыз. Ал шамасынан тыс қарызға батып қажылыққа бару – Исламда құпталған амал емес.
Қажылыққа әке-шешесі тұрып баласының баруы әдептілікке жатпайды. Әке-шешенің батасы мен ризалығын алу маңызды.
Қажылық ғибадатының міндет және дұрыс болу шарттары мынадай: мұсылман болуы, ақыл-есі дұрыс болуы, балиғат жасына жетуі, азат болуы яғни, тұтқындарға, түрмедегілерге, құлдарға міндет емес, денсаулығы болуы (ақсақал, сал сияқты ауруға ұшырағандар, көлікке өздігінен міне алмайтындарға міндет емес), қажетті қаражаты (әйел, бала-шағасы ақшаға мұқтаждығы болмауы керек) болуы, баратын жолдың сенімді (қауіпті және қатерлі жағдайлар болмауы) болуы, әйел адамдардың қасында алып жүретін махрамы (махрам саналатындар – күйеуі, туған әкесі, балиғатқа жеткен, ақыл-есі сау ұлы, туған інісі не ағасы, әкесінің және анасының туған ағасы не інісі…) болуы.
«Әл-Имран» сүресінің 97-аятында: «Алланың үйін зиярат етуге шамасы келетін әрбір адам үшін қажылыққа бару – оның мойнындағы Алланың ақысы. Ал егер кімде-кім күпірлік қылып, қажылықты жоққа шығарса, (біліп қойыңдар), Алла ешкімге мұқтаж емес, керісінше бүкіл ғалам Оған мұқтаж», – деген.
Демек, қажылық рәсімі шамасына қарай шынайы ниетпен орындалатын құлшылық түрі екен.
Икрам АЙТАЕВ
