Сұрақ: Намаздың хикметі неде?
Жауап: Намаз – Алланың бекіткен парыз амалдарының бірі. Адам намаз оқу арқылы Алламен байланысын нығайтады. Шынайы ниетпен оқылған намаз адамды жамандықтан тыйып, жүректі тыныштандырады және күнәлардың кешірілуіне себеп болады.
Сондай-ақ жамағатпен оқылған намаз адамдар арасындағы бауырмашылдық пен теңдікті арттырады.
Мұсылман адам бес уақыт намазды орнымен оқып, үлкен күнә жасамаса, кіші күнәлары кешірілетіні Құран аяттары мен хадистерде баяндалған. Кіші күнәларды жасай беруге болады деген пайымнан сақ болғанымыз дұрыс.
«Анкабут» сүресінің 45-аятында: «(Уа, Мұхаммед!) Өзіңе Кітаптан уахи етілгенді оқып, өзгелерге жеткіз және намазды кемеліне жеткізіп оқы. Өйткені намаз – адам баласын арсыздықтан һәм жамандық атаулыдан тыяды» десе, Пайғамбарымыздың (с.а.у.) хадисінде: «Бес уақыт намаз бен жұма намазы үлкен күнә жасамаған адамды келесі жұмаға дейінгі жасаған күнәларынан арылтады», деген.
Демек, ықыласпен оқылған намазда сауаптар мен хикметтер толы. Намазымызды толық орындап, Алланың ризашылығына бөлене берейік.
Икрам АЙТАЕВ
