Йемен жағалау күзеті Сомали қарақшыларының Аден шығанағында танкерді басып алғанын хабарлады.
Мәліметке сәйкес, танкер Хадрамаут провинциясының жағалауынан шамамен 26 теңіз милі қашықтықта Сомали қарақшыларының қолына түскен.
Бұған дейін Ұлыбританияның Теңіз сауда операциялары басқармасы (UKMTO) Аден шығанағында кеме бортына «рұқсат етілмеген тұлғалардың» мінгені туралы хабарлаған оқиғаның шын мәнінде ASANA мұнай танкерін Сомали қарақшыларының басып алуы екені белгілі болды. Бұл туралы Йеменнің Жағалау күзеті мәлімдеді.
Ведомствоның хабарлауынша, танкер Хадрамаут провинциясы жағалауынан шамамен 26 теңіз милі қашықтықта басып алынған.
Оқиға туралы дабыл түскеннен кейін Жағалау күзетінің жедел басқару орталығы халықаралық серіктестермен және өңірдегі теңіз қызметтерімен үйлестірілген іс-қимылды бастаған.
«Кеме төңірегіндегі жағдай мен оқиғаның өрбуі тұрақты бақылауда», – делінген хабарламада.
Сондай-ақ танкерге Йемен Жағалау күзетінің катерін қоса алғанда теңіз күштері жіберілгені, ал әуеден де бақылау жүргізіліп жатқаны айтылды.
Алдын ала мәлімет бойынша, капитан көпіршесінің маңынан бір адам байқалған. Танкер баяу қозғалып, оңтүстік-шығыс бағытта Сомали жағалауына қарай бет алған.
Йемен Жағалау күзеті жағдайдың халықаралық серіктестермен бірлесіп жіті бақылауда екенін атап өтті.
Әзірге танкердің қай мемлекеттің туы астында жүзгені туралы ақпарат жарияланған жоқ.
Еске салсақ, бұған дейін Ұлыбританияның Теңіз сауда операциялары басқармасы (UKMTO) Аден шығанағында Йеменнің Әл-Мукалла қаласынан шамамен 65 теңіз милі шығыста жүзіп бара жатқан кемеге «рұқсат етілмеген тұлғалардың» мінгенін хабарлап, оқиғаға қатысты тергеу басталғанын мәлімдеген болатын.
