Алматы қаласы полиция департаменті интернет-алаяқтықтың алдын алу бағытындағы жүйелі жұмыстарын жалғастырып жатыр. Кезекті профилактикалық бейнеролик азаматтарды қылмыстық әрекетке тартудың кең таралған тәсілдерінің бірі – дропперлікке арналған, деп хабарлайды Egemen.kz.
Полицейлердің айтуынша, дроппер – кездейсоқ қатысушы емес, қылмыстық тізбектің бір буыны. Өзінің банк картасын, шотын немесе мобильді қосымшаға қолжетімділікті бөгде адамдарға беру, сондай-ақ олардың нұсқауымен ақша аудару арқылы азамат интернет-алаяқтар жымқырған қаражатты заңдастыруға және айналымға енгізуге қатысушыға айналады.
Алматы қаласы полиция департаменті профилактикалық жұмысты үйлестіру басқармасы бастығының орынбасары Рүстем Әбдіғалиев тұрғындарды оңай табыс туралы уәделерге сенбеуге шақырды.
«Қазіргі таңда алаяқтар ұрланған ақшаны айналымнан шығару үшін дропперлерді белсенді пайдаланып жүр. Көптеген азамат банк картасын уақытша беріп немесе сыйақы үшін ақша аударса, ешқандай қауіп жоқ деп қателеседі. Бұл – өте қауіпті жаңсақ пікір. Дропперлік – қылмыстық жауапкершілік көзделген әрекет. Сондықтан қаншалықты тиімді болып көрінсе де, мұндай ұсыныстарға келіспеуге шақырамыз», деді Рүстем Әбдіғалиев.
Қазақстан Республикасы Қылмыстық кодексінің 232-1-бабына сәйкес дропперлік үшін қылмыстық жауапкершілік көзделген. Аталған баптың санкциясы жасалған қылмыстың ауырлығына қарай айыппұлдан бастап, мүлкін тәркілей отырып жеті жылға дейін бас бостандығынан айыру жазасын қарастырады.
Полиция азаматтарды банк карталарын, шот деректемелерін, логиндерін, құпиясөздерін және SMS-кодтарын бөгде адамдарға бермеуге шақырады. Интернет-алаяқтықтың алғашқы белгілері байқалған жағдайда бірден “102” нөміріне хабарласу қажет.
