Бір күні Мұса пайғамбар (ғ.с) Тұр тауының қасиетті құзында Алла Тағаламен тілдесу құрметіне ие болған кезде:
– Уа, Раббым! Жәннаттағы көршілерімнің кім болатынын білдірсеңіз екен, — деп өтініш білдірді.
Сонда Алла Тағала:
– Сенің Жәннаттағы көршілеріңнің бірі – пәлен жердегі қасапшы. Егер көргің келсе, оның дүкеніне барып, бір түн қонақ болып қайт, – деп бұйырды.
Бұл хабарды естіген Мұса пайғамбар таңырқап қалды. Қарапайым бір қасапшы қандай ізгі амалымен осындай ұлы мәртебеге жетті екен деген ой көңілін баурады.
Осыны білмек болып, ол әлгі қасапшы тұратын ауыл жаққа жол тартты. Біраз уақыттан кейін қасапшыны тауып:
– Уа, Алланың құлы! Бүгін түнде саған қонақ болсам деймін. Рұқсат етесің бе? – деді.
Қасапшы қуана қарсы алып:
– Қош келдіңіз! Алланың қонағына есігім әрдайым ашық. Кеш бата бірге үйге қайтайық, – деді.
Кеш түскен соң қасапшы себетіне азық-түлік толтырып, қонағымен бірге үйіне бет алды.
Үйге кіргенде ол:
– Маған аз ғана мұрсат беріңіз. Алдымен мына үйдегі ең қадірлі қонағымның жағдайын жасап алайын, содан кейін сізбен бірге боламын, – деді.
Сөйтіп, бөлменің бір бұрышында ілулі тұрған бесіктей тербелмелі төсектің жанына келді. Ішінен әбден қартайып, әл-дәрмені қалмаған бір кейуананы көтеріп алды. Оның үстін ауыстырып, тазалап, бар қажетін өтеді. Сосын өз қолымен тамақтандырып, жайлап орнына жатқызды.
Қасапшының әр қимылынан шексіз мейірім мен құрмет сезіліп тұрды.
Осы кезде қарт ана әлсіз дауыспен түсініксіздеу бір дұға айтты. Қасапшы болса:
– Әмин! – деп жауап берді.
Мұса пайғамбар бұл көрініске сүйсініп:
– Бұл кісі кім? Өзің ерекше құрмет көрсетіп жатыр екенсің, – деп сұрады.
Қасапшы:
– Бұл менің анам. Кезінде мен үшін қаншама қиындыққа төзді, қаншама бейнет көрді. Енді мен де перзенттік борышымды өтеуге тырысып жүрмін, – деді.
Мұса пайғамбар тағы сұрады:
– Анаң жаңа ғана бір нәрсе айтты. Сен де «әмин» дедің. Не деп дұға жасады?
Қасапшы күлімсіреп:
– Анам маған күн сайын: «Балам, Жәннатта Мұса пайғамбарға көрші болғайсың!» деп бата береді. Мен соған «әмин» деймін. Бірақ бұл қайдан мүмкін болсын?! Мұса пайғамбар қайда, мен қайда?! Оның дәрежесіне жету тұрмақ, жанына жақындаудың өзі арман емес пе?! – деді.
Сонда ғана Мұса пайғамбар өзін таныстырып:
– Қуанышты хабар қабыл ал! Мен – Мұса пайғамбармын. Алла Тағала сенің Жәннатта маған көрші болатыныңды хабарлаған соң, сені көруге арнайы келдім, – деді.
Қасапшы таңданыс пен қуаныштан көзіне жас алды. Ал Мұса пайғамбар оған:
– Анаңа қызмет етуден ешқашан жалықпа. Ананың разылығы – Алланың разылығына апарар жол, – деп насихат айтып, жолына шықты.
Ғибрат
Ананың жүрегінен шыққан ақ бата – қабыл болатын дұғалардың бірі. Кейде адамды биік дәрежелерге жеткізетін нәрсе оның байлығы да, атағы да емес, ата-анасына деген ықыласы мен қызметі болады.
Сондықтан дана халқымыз:
«Анаңды Меккеге үш рет арқалап апарсаң да, ақ сүтін өтей алмайсың» деген. Расында, ананың ақысы өтелмес, ал ананың батасы – таусылмас қазына.
Дайындаған – Тұрар ТҮГЕЛҰЛЫ
