Сұрақ: Зекет пен садақаның айырмасы қандай?
Жауап: «Зекет» сөзі тазарту көбею, өсу деген мағыналарды қамтыса, садақа сөзі шын ықыласпен сыйлау деген мағынаны береді.
Зекет – Исламдағы бес парыздың бірі. Адамның мал-дүниесі шариғат белгілеген мөлшеріне жетіп, жылға толса, алтын-күміс, төрт түлік мал, ақша т.б. дүниелерден кедейлерге, мұқтаждарға, қарызы барларға, жолда қалғандарға, т.б. беріледі.
Садақа – қайырымдылық мақсатында мұқтаж адамдарға кез келген уақытта беріле беретін ақшалай немесе заттай көмек түрі. Садақа беру – жақсы амалдардан. Адам сауапты үміт етіп қайырымдылық көрсету немесе күнәсін жуу, түрлі кесір-кесапаттан, қиындықтардың алдын алып, сақтану мақсатында береді.
Исламда садақа мен зекеттің өзіндік рухани орны ерекше. Екеуі де – адамның шынайы ықыласынан, басқа бір мұқтаж адамға көмектессем екен деген ниетінен туындайтын қайырлы амалдардан. Кез келген қоғамда мұқтаждарға, жесірлер мен жетімдерге қарайласудан асатын игі амал жоқ екен. Демек, зекет – парыз болса, садақа – ізгілік амал.
Зекетті арнайы адамдар санаты ғана берсе, садақаны кез келген жанның беруіне болады.
Икрам АЙТАЕВ
