Сұрақ: Еліміздегі мешіттерде не үшін ханафи мәзһабымен намаз оқу керек?
Жауап: Елімізде үш мыңға жуық мешіт бар. Ол – бес уақыт намаз сынды діни рәсімдерді өткізетін орын.
Ханафи мәзһабы қазақ халқының салт-дәстүрімен сабақтасқан. Осы өңірдегі ғасырлар бойы қалыптасқан діни мектеп. Елімізде имамдар мен діни оқу орындары осы мәзһаб бойынша білім алады.
Алайда кез келген орынның, ортаның өзіндік әдебі, мәдениеті болғаны секілді мешіттің де өзіндік әдебі бар. Мешіттің өзіндік әдебі сақталмаса, ішкі тәртібі бұзылып, аяқасты болуы әбден мүмкін. Сондай-ақ, мешіттерде намаз белгілі бір мәзһаб тәртібімен оқылады, өйткені жамағаттың бірлікпен ғибадат етуі аса маңызды. Мешітте жамағаттың бірлігін сақтамай, әркім намазды өз білгенімен әртүрлі қимылмен оқуы адамды шатастырады. Мысалы кездесетін діни рәсімдер барысында қол байлау мәселесі, «әминді» жария айту, рукуғқа көтергенде қолды қайта-қайта көтеру, соңында көпшілікпен дұғада қалмау сияқты т.б. мәселелер.
Мұның салдары имамға бағынбай, менің дәлелім мықты деп діни шиеленісті іске бейім болады. Мұндай әрекеттердің түбі түрлі діни көзқарастардың артуымен дінараздық алауыздыққа соқтырады. Демек, жамағаттың бірлігін сақтап, имамға ұйып намаз оқу қайырлы іс екенін ұмытпағанымыз жөн.
Икрам АЙТАЕВ
