Осыдан сегіз жыл бұрын ұстазым Мехметали Сула дүниеден озған еді. Таяу күндері ұстазымды достарыммен бірге зиярат ету нәсіп болды.
Алматыдан ұшып Стамбулға барғанымызда, екі ұлы Хасан Хусни Сула мен Ахмет Суламен кездесіп, қазақ шапандарын тарту еттік. Хасан Хусни әкесіне қатты ұқсайды екен. Әкесі сияқты ол да Ерзурум елді мекенінде мүфти болып, зейнетке шығыпты. Ал, інісі Ахмет өзі қари, өзі заңгер болып жұмыс істейді.
Негізінде, біздің ұстазымыз ең алғаш Түркияда уағызшы қызметіне тағайындалған тұлға болыпты. Кейіннен мүфтилік қызмет атқарыпты. Араб, парсы тілінде еркін сөйлейтін.
Түркияда Дін істері басқармасы болып, оны Министр мүфти басқарады екен. Біздің облыс өкіл имамдары сияқты әрбір облыс, провинциялардың мүфтилері болады.
Тоқсаныншы жылдары ұстазымыз зейнетке шығып, Алматыға келіп, біз оқыған «Әл-Хабир» медресесінде Құраннан екі жыл дәріс берген еді. Медресені ашқан марқұм Әли қажы әл-Апшеронимен өте сыйласып, бір-бірімен шығысып қызмет етті. Ұстазымыз Әли қажыны өте жақсы көріп: «Қазіргі заманның Әлиі», деп айтатын.
Сонымен, келесі күні достарыммен бірге ұстазымыздың туған жері Трабзонға ұшақпен баратын болдық. Трабзон – Стамбулдан мың шақырым ұзақта, Грузияға жақын, Қара теңіз жағалауында орналасқан таулы елді мекен.
Табиғаты әсем, таулы, орманды, ауасы сафтай таза, сұлу жер болып шықты. Әрбір таудың басына шәй, зейтүн ағаштары егілгенін көрдік. Такси жалдап, әрі қарай Трабзоннан алпыс шақырымда орналасқан Чайкара елді мекеніне бардық. Ол жерде бізді ұстазымыздың балдызы Ахмет Ариф аға күтіп алды.
Ол кісі де көп жылдар илаһиет (имам-хатиб дайындайтын) университетте ұстаздық етіп, зейнетке шығыпты. Өте бір ықыласты, кішіпейіл адам екені көрініп тұрды.
Чайкарадан әрі теңіз деңгейінен 2,5 мың метр биіктікте орналасқан Сұлтан Ахмет жайлауына бардық. Жолдарынан әрі қар кетпеген, биік таулы мекен екен. Жолда ұстазымыздың жұбайы Ханифа Сула апаның басына тоқтап, дұға еттік.
Кейін Сұлтан Ахмет жайлауында жерленген ұстазымыздың қабіріне жеттік. Кезінде өзі мұрындық болып салғызған үлкен мешітті көрдік. Ұстазымыз балаларына өзі қайтыс болса да, азанның дауысын естіп жатайын деп осы мешіттің жанына жерлеуді өсиет етіпті.
Ол Измирде қайтыс болып, жаназасы оқылған соң, осы Сұлтан Ахмет жайлауына әкеліп жерленген. Ұстазымыздың басында шәкірттері атынан хатым Құрандар оқып, дұға жасап қайттық.
Сұлтан Ахмет жайлауында жүз шақты үй бар, бірақ адамдар тұрмайды екен. Негізінен бұл курорттық жер болып, жазда ғана ашылатын көрінеді. Біз барған кезде араб елдерінен туристер келіп жатты.
Алла зияратымызды қабыл етіп, сауапқа жазсын!
Қуат ҚАБДОЛДА
