Бұл дүниеде бізге ең ұлы аманат берілді. Ол – Алланың сөзі, қасиетті Құран Кәрім. Бірақ сол Құран қиямет күні бізге дос бола ма, әлде дұшпан бола ма – бұл әрқайсымыздың бүгінгі амалымызға байланысты.
Мұхаммед пайғамбар (с.ғ.с.) бізге ауыр бір ақиқатты ескертеді: Қиямет күні Құран адам бейнесінде келіп, біреуге шапағат етсе, біреуге шағым айтады екен.
Ойлап көріңіздерші…
Бір адам Алланың алдына әкелінеді. Бірақ оның жанында араша түсетін ешкім жоқ. Кенет Құран тіл қатады:
– Уа, Раббым! Бұл пендең аяттарыңды аяқасты етті. Парыздарыңды орындамады. Тыйым салған істеріңе бой алдырды…
Сол сәтте Құран оның қарсыласына айналады. Оны жетелеп, ақырында тозаққа тастағанға дейін қасынан ажырамайды.
Бұл – қандай қорқынышты көрініс!
Күніне қолымызға алмаған Құран…
Оқымай шаң басқан сөрелерде қалған Құран…
Тек құдайы садақада ғана ашылатын Құран…
Сол Құран ертең бізге қарсы сөйлесе, не істейміз?
Ал енді екінші бір адамды елестетіңіздер…
Ол да Раббысының алдына келеді. Бірақ бұл жолы Құран оның қорғаушысы болып тұрады:
– Уа, Раббым! Бұл пендең аяттарыңды құрметтеді. Парыздарыңды орындады. Адал мен арамға мұқият болды…
Сонда Құран оның қолынан ұстап, жанынан бір сәт ажырамайды. Оған құрмет көрсетіліп, сый-сияпат беріледі. Өйткені ол Құранмен өмір сүрді.
Құрметті мұсылман бауырлар!
Құранды тәрк ету – тек оны жоққа шығару ғана емес.
Оны оқымау – тәрк ету.
Мағынасына үңілмеу – тәрк ету.
Өмірде қолданбау – тәрк ету.
Қасиетті аятта да ескертіледі:
– «Раббым! Менің қауымым бұл Құранды мүлде тәрк етті…» (Фұрқан, 25/30).
Бұл сөзді Мұхаммед пайғамбар (с.ғ.с.) айтатынын ұмытпайық! Ертең сол шағымның ішінде бізде болып қалмайық!
Сондықтан, ағайын!
Құранды тек қабырғаға іліп қою үшін емес, жүрекке орнату үшін түсірілген.
Оны тек оқу үшін емес, амал ету үшін түсірілген.
Ол – өмір кітабы!
Күн сайын аз болса да оқып тұруды әдетке айналдыруымыз қажет.
Мағынасын да түсінуге тырысайық.
Әрбір аятты өмірімізге енгізейік.
Сонда ғана Құран бізге шағым емес, шапағат ететін болады!
Алла Тағала баршамызды Құранмен өмір сүретін, Құранмен тіріліп, Құранмен жан тапсыратын құлдарынан етсін!
Қиямет күні Құранның шапағатына бөленуді барша момын-мұсылманға нәсіп етсін! Әмин!
Дайындаған – Тұрар ТҮГЕЛҰЛЫ
