Сұрақ: Пайғамбар (с.а.у.) атынан жалған хадис айту күнә ма?
Жауап: Ислам ғалымдары Құран аяттары мен хадистердің мағыналарын талдап, араб тілінен аударып халыққа ұсынып қойған. Өзінше тікелей арабша мәтінін оқып, талдау қателікке бой алдырады. Исламда хадисті пайғамбарымыз (с.а.у.) айтты деп өтірік немесе бұрмалап айту – ауыр күнәлардан.
Негізі пайғамбарымыздың (с.а.у.) айтқан сөздері мен жасаған істері имам Бұхари, имам Мүслим т.б. сынды хадистанушы ғалымдардың кітаптарында тізбектелген. Оны оқып, дұрыс пайымдап, ғалымдардың дұрыс түсіндірмелерімен қабылдаған абзал.
Жалған сәлафилер сынды өзім білем, мәзһаб ғалымдары керек емес деп, өзінше түсіндіру бұрыс әрекет. Ақыл-парасаты жетпей айтуда ауыр күнә бар. Мұндай әрекет жат діни ағым өкілдеріне тән. Себебі, ондай көзқарастардың салдары қоғамда дін араздық алауыздыққа соқтырады.
Пайғамбарымыз (с.а.у.) хадисінде: «Менің атымнан жалған сөйлемеңдер. Кімде-кім менің атымнан жалған сөйлесе, өзіне тозақтан орын дайындай берсін», деген.
Демек, ғалымдардың дұрыс дереккөздеріне жүгінбей, көз жеткізбей хадис деп айту немесе нәпсіге ыңғайлап айту ауыр күнә.
Икрам АЙТАЕВ
