Сұрақ: Діни ағым деген не?
Жауап: Дәстүрлі дін – ғасырлар бойы салт-дәстүрлерімен сабақтасып халықтың рухани өмірінен орын тапқан бейбіт дін. Исламның негізі қағидалары – бейбітшілік пен тұрақтылық. Ал, дәстүрлі діндерді бетперде қылып, сол діннің негізгі сенімдері мен қағидаларын өздеріне ыңғайлап әртүрлі түсіндіретін бағыт немесе топ «діни ағым» санатынан.
Қазіргі таңда әлеуметтік желілерде шейхсымақтар мен жалған ұстаздар жеке басына топ құрып, Құран аяттары мен хадистердің мазмұнын бұрмалап әрқалай түсіндіріп жүр. Діни ағым өкілдерінің бағыт беретін өзіндік көшбасшылары мен ғалымдары болады, әдетте негізгі дінге сүйенген сияқты болып, діни қағидаларды өзгеше тәпсірлейді, кейде діни рәсімдерінде де айырмашылықтар болады.
Сонымен, кейбір діни ағымдар қоғамға байсалды көрінуі мүмкін, кейбірі радикалды немесе қауіпті сипатта болуы мүмкін. Діни ағымдардың түпкі мақсаты – елдің тұрақтылығына сызат түсіру. Сондықтан отандық дәстүрлі тәлімгерлердің кеңестеріне жүгініп, ақпарат алу аздық етпейді.
Пайғамбарымыздың (с.а.у.) хадисінде: «Шын мәнінде, менің үмбетім адасушылықта бас қоспайды. Егер қарама-қайшылық көрсеңдер, міндетті түрде қара топпен (яғни көпшілікпен) бірге болыңдар», деген. Демек, ҚМДБ-ның сүзгісінен өткен діни ақпарат дәстүрлі діни таным қалыптасуына негіз болады екен.
Икрам АЙТАЕВ
