Сұрақ: Діндегі рухани байлық не?
Жауап: Адамның жан-дүниесіне рухани байлық қажет. Қазіргі қоғамда байлықты материалдық жетістік деп пайымдайтындардың саны көп. Адам адалынан еңбек етіп, байлыққа қол жеткізуі дінде құпталған іс.
Негізі адамға жүрек тыныштығы аса қажет. Исламда бақыт – жүректің тыныштығы екендігі белгілі. Бұл тыныштық намаз, дұға, зікір арқылы қалыптасады. Ислам тек рухани өмірді емес, дүниелік өмірді де жоққа шығармайды. Шынайы бақыт – осы дүниеде дұрыс өмір сүріп, ақыретте де игілікке жету. Мұсылманның басты мақсаты еңбек етіп, отбасы құрып, қоғамға пайда келтіру болуы керек. Адамның ішкі тұрақтылығы сабыр-сынақтарға төзімділік пен шүкіршілік, барға разы болумен артады екен.
Бақыт – тек сезім емес, ол иман, жүрек тыныштығы, дұрыс амалмен, сабыр және шүкір арқылы қалыптасады.
Пайғамбарымыз (с.а.у.) хадисінде: «Нағыз байлық – дүниенің ағыл-тегіл көптігі емес. Нағыз байлық – жан сарайының байлығы», деген. Қоғамға пайда әкелетін рухани кемел азаматтарымыз көп болсын.
Икрам АЙТАЕВ
