Али Хаменеи 28 ақпанда АҚШ пен Израиль жүргізген арнайы әскери операциядан кейін қаза тапты. Бұл ақпаратты 1 наурыз күні таңертең Иранның Tasnim, IRNA, ISNA, Mehr және Fars мемлекеттік агенттіктері растады, деп жазады Egemen.kz.
Fars агенттігінің хабарлауынша, Хаменеи Тегерандағы резиденциясында жұмыс орнында болған кезде қаза болған.
«Ислам революциясының Ұлы көшбасшысы, мәртебелі Аятолла Хаменеи 28 ақпан, сенбі күні сионистік режим мен АҚШ жасаған таңғы шабуыл нәтижесінде шейіт болды», делінген мәлімдемеде.
Ел үкіметі 40 күндік жалпыұлттық аза тұту жариялап, жеті күн демалыс күндерін белгіледі. Хаменеи Ислам Республикасын соңғы 36 жыл бойы басқарған.
Иран президентінің ресми Telegram-арнасында келесідей мәлімдеме жарияланды:
«Бұл ауыр қылмыс жауапсыз қалмайды… Біз бұл қылмысты ұйымдастырып, жүзеге асырғандарды өкінуге мәжбүрлейміз», делінген.
Сондай-ақ сенбі күні Тегеран қаласына жасалған АҚШ пен Израильдің шабуылы салдарынан Иранның Қорғаныс кеңесінің хатшысы, адмирал Али Шамхани және Ислам революциясы сақшылары корпусының (КСИР) бас қолбасшысы, генерал-майор Мохаммад Пакпур қаза тапқаны белгілі болды.
Иранның жоғарғы көшбасшысының кеңесшісі Мохаммад Мохбер революция жетекшісі қаза болғаннан кейінгі өтпелі кезеңде жауапкершілікті ел президенті, сот билігінің басшысы және Қамқоршылар кеңесінің бір факихі өз мойнына алатынын мәлімдеді.
