Дұғада «Қаласаң, мені кешір» деп айтуға бола ма?

Сұрақ: Дұғада «Қаласаң, мені кешір» деп айтуға бола ма?

Жауап: Адам Аллаға мұқтаждығынан дұға тілейді. Кейбір азаматтар дұғаның әдебін білмей, уайымға түсіп «қаласаң кешір, қаламасаң кешірме» сынды сөздерді орынсыз қолданады. Мұндай орынсыз сөздерді қолдану Исламда құпталмаған.

Дұға жасаудың өзіндік орындары мен әдептері жайлы хадистерде кең ақпараттар қамтылған. Адам дұға тілегенде Алланың құдіретіне күмән келтірмеу керектігін білуі, жасалған дұғада сенімді болуы, батыл болуы, дұға сұралғанда күмәнданбау керектігін түсінгені абзал.

Пайғамбарымыз (с.а.у.) хадисінде: «Алладан тілек тілегенде ешбірің: «Уа, Алла! Қаласаң, мені кешір! Уа, Алла! Қаласаң, мені мейіріміңе бөле!» деп айтпасын, керісінше тілегін нақты айтып, табандылықпен сұрасын, өйткені (құлының дұғасын қабыл алып, алмау мәселесінде) Алланы ешкім мәжбүрлей алмайды», деп айтты», деген.