Абай облысы аумағында ауа райының күрт суытып, аязды күндердің басталуына байланысты облыс мешіттері мен ҚМДБ-ның «Зекет және қайырымдылық» қорының ұйымдастыруымен «Тегін такси» қайырымдылық акциясы өткізілуде.
Игі шара аясында мешіт имамдары мен ерікті жамағат мүшелері қоғамдық көлік аялдамаларында тұрған тұрғындарды үйлеріне тегін жеткізіп салуда. Бұл бастама қыстың қақаған аязында халыққа қолдау көрсетіп, қоғамдағы өзара жанашырлық пен қамқорлықты арттыруды көздейді.
Абай облысының Бас имамы Асқар Әбітайұлы аталған акцияның басты мақсаты – ел арасындағы бауырмашылықты нығайтып, береке-бірлікті күшейту екенін атап өтті. Сондай-ақ ол көлігі бар азаматтарды мүмкіндіктеріне қарай осы сауапты іске үлес қосуға шақырды.
Акцияға қатысқан ерікті азаматтар мұндай қайырымдылық шаралары жыл сайын дәстүрлі түрде ұйымдастырылып келе жатқанын айтып, игі іске әрдайым атсалысуға дайын екендерін жеткізді.
Өз кезегінде «Тегін такси» қызметін пайдаланған тұрғындар ұйымдастырушыларға ризашылықтарын білдіріп, ақ баталарын жаудырды.
Айта кетейік, аталған қайырымдылық акциясы аяздың беті қайтқанға дейін жалғасады. Алла Тағала халқымызға амандық пен береке-бірлік нәсіп етсін.
