Сұрақ: Ниетің дұрыс болса, намаз оқымауға бола ма?
Жауап: Исламда барлық амалдар ниетке байланысты орындалады. Ниет –адам әрекетінің нақты мақсатын білдіреді. Амалдардың дұрыс болуы ниетке байланысты.
Ал, ниетім таза деп парыз амалдарды орындамау дұрыс емес. Себебі ниет жалғыз өзі парыздарды алмастырмайды. Ниет кез келген құлшылықтың негізі, бірақ амалмен бірге болуы керек. Ораза, намаз – Алланың парыз еткен құлшылықтары, оларды өз уақытында шынайы ықыласпен орындау міндет.
Пайғамбарымыздың (с.а.у.) хадисінде: «Амалдар ниетке байланысты» деген, яғни амал бар, ниет соған бағыт береді. «Ниетім таза» деп намаз оқымай, ораза ұстамай қою шариғат бойынша дұрыс емес түсінік.
Хадисте: «Амалдардың қабыл болуы әрі сауапты болуы ниетке байланысты. Кімде-кім неге ниет етсе, оның қарымтасын алады» деген.
Демек, Исламда ниет амалмен бірге болғанда ғана құлшылық толық болады екен.
Икрам АЙТАЕВ
