Сұрақ: «Жұма мүбәрак болсын!» деп айту дұрыс па?
Жауап: Мұсылмандар үшін ерекше күндер – екі айт мерекесі және жұма күні. Бұл күндердің ерекшелігі мен қасиеттері жайлай хадистерде кең баяндалған.
Дәстүрлі дінде «Жұма мүбәрак болсын!» деп, құттықтау парыз, уәжіп деген талап жоқ. Жұма күнімен құттықтау, бір-біріне ізгі тілек айту дәстүрлі дінге жат емес.
«Жұма» сөзі жиналу, бірігу, бас қосу деген мағыналарды қамтиды. Ол мұсылмандардың жұма күні ұжымдық оқитын міндетті намазы.
«Мүбәрак» – араб тілінен енген қасиетті, берекелі, игі деген мағынаны білдіретін сөз. Сонымен «Жұма мүбәрак болсын!» деген сөз тіркесі «қасиетті жұмаңыз берекелі болсын!» деген ізгі тілек, ықылас мағынасында қолданылады.
Пайғамбарымыз (с.а.у.) хадистерінде: «Жақсы сөз – садақа», «Мұсылмандар жақсы деп санаған iс – Алла Тағала алдында да жақсы», – деп, жақсы сөз айтуға насихаттайды.
Кейбір жат дінді ұстанушы азаматтар Пайғамбарымыз (с.а.у.) кезінде айтылмаған «бидғат» деп, сөздің мән-мағынасына назар аудармай адастырып жүр. Мұндай діни көзқараста жүру теріс діншілдікке соқтыратынын ұмытпайық.
Икрам АЙТАЕВ
