Сұрақ: Қандай адамдар парыз, уәжіп, сүннет амалдарды істеп, харам, мәкрүһ, мүстакраһ амалдарды істемеуі тиіс?
Жауап: Мүкәллаф, яғни балиғат жасына жеткен және ақыл иесі болған адамдар.
Сұрақ: Балиғат жасына жеткен адам деп кімді айтамыз?
Жауап: Жасы кемелденген адам.
Сұрақ: Ақыл иесі деген кім?
Жауап: Ақылы толыққан адам.
Сұрақ: Сәби, яғни жас балалар балиғатқа жасқа толған деп есептеле ме?
Жауап: Олар балиғат жасында деп есептелмейді.
Сұрақ: Есі ауған, ақылынан адасқан кісілер ақыл иесі боп есептеле ме?
Жауап: Олар ақыл иесі боп саналмайды.
Сұрақ: Сәби балалар және есі ауған адамдар парыз және уәжіп амалдарды орындай алмаса немесе харам амалдардан сақтана алмаса, олар күнәһар боп есептеле ме?
Жауап: Күнәһар болмайды. Өйткені, олар үзірлі, яғни себепті деп саналады.
Сұрақ: Ер бала неше жасында балиғатқа толады?
Жауап: 12 жасқа толғаннан соң және еркектік белгілері көрінгеннен бастап балиғатқа толған болып саналады.
Сұрақ: Қыз бала неше жасында балиғатқа толады?
Жауап: 9 жасқа толғаннан соң және әйелдік белгілері көрінгеннен бастап балиғатқа толған болып саналады.
Сұрақ: Егер аталған жастарында еркектік не әйелдік белгілері көрінбесе, неше жаста балиғатқа толады?
Жауап: Егер аталған жастарда белгілері көрінбесе, онда еркек те, қыз да 15 жасында балиғатқа толады.
Сұрақ: Балиғатқа толып және ақыл иелері болғаннан соң, өмірінің ақырына дейін қандай амалдарды істеу және қандай амалдарды істемеу ләзім?
Жауап: Шариғат бұйырған әрбір амалды істеу және шариғат тыйым салған әрбір амалды істемеу ләзім.
“Ислам ғибадаты” кітабынан
