Сұрақ: Қоғамда діни татулықтың орны қандай?
Жауап: Барлық дәстүрлі діндердің мақсаты – қоғамның тұрақтылығын сақтау. Адамды діни сенімімен бағалап, кәпір, пасық, мұнафиқ, тағұт т.б. деп бөліп жару – кереғар діни ағымдардың ісі. Толеранттылық рухани келісім қағидаттары дәстүрлі діндердің бәріне тән.
Ислам – ұлттар мен ұлыстарды нәсіліне қарамай бейбіт бір шаңырақ астына біріктірген бүкіл әлемдік дәстүрлі дін. Ол ақиқат пен парасаттылық, адамгершілік пен кішіпейілділік секілді қасиеттерге үгіттейді. Сондай-ақ, дінаралық татулықты сақтауға исламда баса мән берілген. Дін атын жамылып өз мақсаттарына жету жолында діни фанатизмге бой алдырып, діни мәтіндерді үзіп-кесіп, орынсыз түсініктемелерді қолданып жүрген бүгінгі жалған радикалды діни топтар шынайы мұсылмандар санатынан емес.
Өз ұлтын сүю, оның тарихын, мәдениетін, салт-дәстүрін, ділін, дүниетанымын құрметтеу, өзге ұлт пен дін өкілдерінің де осындай құндылықтарына құрметпен қарау, ислами құндылықтар аясында ұлтаралық татулықты сақтауға септесу – шынайы мұсылман сипатына тән. Діни татулығымызға нұқсан келтіретін жат танымдардан сақ болғанымыз абзал.
Икрам АЙТАЕВ
