Сұрақ: Алла тағала пайғамбарларға қандай кітаптар түсірген?
Жауап: Пайғамбарларға сену иман шарттарына кіреді. Оларға нәби, расул сөздері қолданылады. Құранда жиырма бес пайғамбардың аты аталған.
Нәби (пайғамбар) – Алланың бұйрықтары мен тыйымдарын өз халқына жеткізген пайғамбар. Расул (елші) – Алла Тағала тарапынан Кітап түсірілген және жаңа шариғат берілген пайғамбар. Хақтың елшілері мен пайғамбарларына иман келтіру – міндет, өйткені оларға иман келтіру иман негіздерінің бірі болып саналады.
Алла Тағала жаратылыстардың ішіндегі ең ұлығы – адамдарға тура жолды үйрету, олардың ақиқатқа жетуі, халал мен харамды айыра білуі үшін пайғамбарларына парақтар мен кітаптарын түсірген. Оларға деген сенім адамзатқа парыз әрі иман негіздерінің бірі болып есептеледі.
Бұған дейін Алла сухуф (шағын кітапша-орамдар), кейін төрт Қасиетті Кітап түсірді. Олар: Тәурат – Мұса (а.с.) пайғамбарға, Забур – Дәуіт (а.с.) пайғамбарға, Інжіл – Иса (а.с.) пайғамбарға, Құран Кәрім – Мұхаммед (с.а.у) Пайғамбарға түсірді.
Пайғамбарларға жағымсыз сөз айту ауыр күнә болып саналады.
Икрам АЙТАЕВ
