Сұрақ: Пайғамбарға (с.а.у.) салауат не үшін айтылады?
Жауап: «Салауат» сөзінің құрмет, дұға, мадақ деген мағыналары бар. Ол – Мұхаммед (с.а.у) пайғамбарымыздың аты аталған кезде арнайы айтылатын дұға.
Пайғамбарға салауат айту – сауапты іс. Сол арқылы мұсылмандар пайғамбарға деген сүйіспеншілігі мен құрметін білдіреді.
Салауаттың түрі: «Аллаһумма салли ъала Мухаммәдин уә ъала әли Мухаммәд» (Уа, Аллам! Мұхаммедке және оның әулетіне салауат жолдай гөр). Осындай мазмұндағы басқа да салауаттардың түрлері бар.
«Ахзаб» сүресінің 56-аятында: «Расында, Алла және Оның періштелері Пайғамбарға салауат айтады. Уа, иман келтіргендер! Сендер де оған салауат айтып, сәлем жолдаңдар», – деген.
Имам Муслимнің хадис жинағында: «Кім маған бір салауат айтса, Алла Тағала оған он салауат айтады» – деген.
Күнделікті салауат айтуда үлкен сауап бар!
Икрам АЙТАЕВ
