Кеше бір ағамызбен сөйлесіп отырып, мына бір әңгімесіне қызықтым.
Ол кісі екі жыл бұрын инфаркт алыпты. Инфарктан соң ауыр жұмысты қойып, ешнәрсеге ренжіп, уайымдамауы қажет екен. Бос уақыты көбейген соң, өзіне бір хобби тауып алыпты.Онысы – туыстары мен достарының үйіндегі бұзылып қалған сағаттарды ақысыз, сыйлық ретінде жөндеп береді екен.
Осылайша жиырмадан артық сағат жөндепті.
Таяуда бір досы қайтыс болғанда, сол үйдегі үш сағаттың барлығы отағасы қайтыс болған уақытта тұрып қалған екен. Марқұмның бала-шағасы, әсіресе жұбайы сағаттарды көрген сайын, қатты уайымдап жүретін көрінеді. Ағамыз сағаттардың барлығын жөндеп беріп, оларды қуанышқа бөлепті.
Мен әлгі ағамызға: «Пайғамбарымыз (с.а.с,): «Мұсылман бауырыңа күліп қараудың өзі – садақа» деп айтқан, мынауыңыз нағыз сауапты іс екен. Бейне бір адамдарға уақыт сыйлағандай екенсіз» деп, өзін де қуантып тастадым.
Расында, айналамызда біз көңіл бөле бермейтін, қаншама сауапты іс бар дейсіз?!
Алла баршамызға сауапты істі көп жасауға жазсын!
Қуат ҚАБДОЛДА
