Сұрақ: Зекетті кімдерге береміз?
Жауап: Исламның бес парызының бірі – зекет. «Зекет» сөзінің мағынасы көбею, өсу, берекеттену, тазалық дегенді қамтиды. Зекет беруді міндет ететін байлыққа ие болған мұсылман, байлығының мөлшеріне қарай жылына бір рет шариғатта белгіленген адамдарға берілетін дүние.
Мұсылман адам байлығынан садақа, зекет беруі, мал-дүниесін азайтпайды, керісінше арттырады екен. Пайғамбарымыз (с.а.у.) хадисінде: «Садақа малдан ештеңе азайтпайды» деген.
Ал зекетті кімдерге беру керектігі жайлы «Тәубе» сүресінің 60-аятында: «Шын мәнінде садақалар (зекеттер), кедей-кепшіктерге, түгі жоқ міскіндерге, зекетті жинауға тағайындалған адамдарға, көңілдері жібітілуі мақсат етілгендерге, құлдарды азат етуге, қарызға батқандарға, Алла жолына және қиналған жолаушыларға берілуі Алла тарапынан парыз етілді» деп нақтылап берген.
Зекет беруге ниетті азаматтар ҚМДБ-ға қарасты жергілікті орындардағы зекет қорларына жауапты имамдармен кеңесуі артық етпейді.
Икрам АЙТАЕВ
