Қазіргі кезде кейбір адамдар тарапынан қажылыққа бару парыздығын жоққа шығару, оны босқа ақша шашу деп сөгулері белең алуда. Бұлардың артында белгілі бір дінге қарсы топтар тұрғаны бесенеден белгілі. Алайда, олар Алланың Өзі жүректерін бұрып қойған қасиетті жерден, үлкен нығмет болған амалдан ешкімді алып қоя алмайды.
Алла Тағала Құран Кәрімде: «Раббымыз! Ұрпақтарымның кейбірін егінсіз ойпатқа, құрметті үйіңнің (Қағба) жанына орналастырдым. Раббымыз! Олар намазды оқитын болсын! Енді адамдардың көңілін оларға ауатын қыл! Сондай-ақ оларды, жемістермен ризықтандыр! Әрине олар шүкіршілік етер» деп бұйырған. (Ибраһим: 37)
Тіпті, кешегі індеттен кейін жолдар ашылғанда қаншама адам умраға, үлкен қажылыққа барып, сағынышын басып жатыр.
Себебі қажылық дегеніміз – Алла Тағаланың пендесіне берген шақыруы. Адам атамыз (а.с.) бен Хауа анамыздың тәубесі қабыл болған жерге келіп, тәубе етуі. Махшар күнінен бұрын барып, сол жағдайды сезініп қайтуы. Алланың қонағы болып, өзіне ғана емес, барша елі үшін де тілек тілеуі.
Атам қазақ: «Алланың жаққан шырағын ақымақ үрлеп өшіре алмайды» деген. Сондықтан әр нәрсені көргенде, не естігенде сене бермей, ілім иелеріне құлақ салған дұрыс.
Мұсылманның амалы әрдайым ниетіне байланысты.
Алла баршамызға тура жолда жүруге жазсын!
Қуат ҚАБДОЛДА
