Сұрақ: Неге кейбір «намазхандар» сәлемге дұрыс жауап қайтармайды?
Жауап: Сәлемдесу – әдептілік пен адамгершіліктің бастамасы. Сол арқылы адамдар арасында жақсы қарым-қатынас қалыптасады. Сәлем болмаған жерде өкпе-реніш пайда болып, дұрыс қарым-қатынас орнамайды.
Адамның көңіл-күйін білу әрі оған да өз ниетіңді ұқтыру, аман-саулықты сұрау сәлемдесуге негізделген. Қазақ дәстүрінде сәлемдесудің жөн-жобалары әрқалай. Келіннің сәлем беру үлгісі, аттан түсіп сәлем беру, қос қолдап сәлем беру, төс қағыстырып амандасу т.б. түрлері көп.
Кейбір намазхандар кереғар діни ағымдардың уағызшыларын дұрыс санап, айтқан уәждерін ақиқат деп қабылдайды. Жалған діни топтар адамның бойынан қазақи құндылықтарды жойып, бұл сәлемнің түрі дұрыс емес, таза арабша амандасу қажет деп адасуға бой алдырып, адастырып жүргені белгілі. Дәстүрлі дін мен салт-дәстүрлерді сабақтастыра білмегендер адасушылыққа бой алдырады. Адасушылықтың түбі – өкініш. Ондай адасқан діни топтардың бидғат, ширк деген сандырақтарынан сақтанғанымыз абзал.
«Ниса» сүресінің 86-аятында: «…Егер сендерге сәлем берілсе, одан да жақсы сәлем беріңдер не солай қайтарыңдар. Шындығында, Алла әрбір нәрсені есептеуші» деген.
Икрам АЙТАЕВ
