Сұрақ: Ораза ұстап жүріп сырқаттанып қалса, не істеу керек?
Жауап: Оразаны денсаулығы бар, үзірсіз жандар ұстай алады. Ислам – адамға жеңілдік жасайтын дін. Рамазан күндері сырқаттанып қалса, ауыруынан айығуға үміті бар науқас кісі, сол күндері ораза ұстамай, кейін тұтпаған күндерінің орнына қаза қылып өтеуіне болады. Егер ораза ұстау оның денсаулығына зиян келтірсе немесе ауруын асқындырып жіберсе, онда ол оразасын ұстамауға рұқсат етіледі.
Ораза ұстауға шамасы жетпеген қарттар, үнемі дәрі қабылдау қажет болып, тоқтату мүмкін болмаса, ауыруларының емі жоқ кісілер шамасы келсе, оразаның орнына әрбір күні үшін мұқтаж адамды тамақтандыру арқылы немесе азық-түлік берумен фидиясын өтей алады. Ораза ұстауға шамасы келмеген жандарға фидия беру – уәжіп.
«Бақара» сүресінің 184-аятында «Ораза ұстауға шамасы әзер жететіндер (яғни, қарттар және созылмалы дертке шалдыққан науқастар қаза болған әр күнге) фидия ретінде бір жарлының (бір күндік екі мезгіл) тамағын (немесе оның құнын ақшалай) беруі керек…» деген.
Алла дерті барларға шипасын берсін!
Икрам АЙТАЕВ
