Сұрақ: Ораза айт: мерекені қалай өткізу керек?
Жауап: Елімізде тойланатын мерекелердің ішінде діни мерекелер де бар. Олар – Ораза айт және Құрбан айт мерекелері. Кейбір адамдар айт мерекелерін қазалы үйлерге көңіл айтатын күн деп біржақты түсінеді. Айт мерекелерінің рухани ауқымы үлкен, оны біржақты түсінуге болмайды.
Айт күндері қуаныштың белгісі болуы керек. Ол күні оразаның қазалары ұсталмайды. Ер азаматтар айт намазына шығар алдында құрмамен ауыздарын ашып, мешітке жаңа киім киіп, хош иіс суларын сеуіп барғаны абзал. Ал әйелдер қауымы үйде қазан асып, дастарқан жайып, айттық шай әзірлейді. Айт барша мұсылманның мерекесі болғандықтан, оны балалар мен қарттарға дейін сезінгені абзал.
Намаз біткен соң мұсылмандар жақсы тілектер айтып, бір-бірін құттықтайды. Мешіттің маңында сыйлықтар таратылып, мерекелік мәдени іс-шаралар ұйымдастырылады. Көршілер бір-бірінің үйіне айтпен құттықтап, дәм ауыз тиеді.
Қазалы үй болса, Құран оқып көңіл айтады. Бауыр, ағайын-туыс, жора-жолдас арасында реніш болса, бір-бірімен кешірім сұрап жарасқаны қайырлы. Ата-аналар мен сыйлы үлкен кісілерге сый-сияпаттар беріп батасын алып, мейірімділік жасауы – игі амалдардан. Сондай-ақ жетім-жесір мен мұқтажраға жомарттық жасау да сауап іс.
Пайғамбарымыздың (с.а.у.) хадисінде: «Ей, адамдар! Бұл күні сәлемді жайыңдар, тамақтандырыңдар, туыстық қатынасты күшейтіңдер және адамдар ұйқыда болған кезде намаз оқыңдар, еш алаңсыз жәннатқа кіресіңдер», деген.
Икрам АЙТАЕВ
