Мәдениет және ақпарат министрі Аида Балаева ұлттық фильмдер деп тануға үміткер киножобаларды іріктеу байқауы жайында пост жариялады.
«2024 жылдан бастап біз киножобаларды іріктеу ережелерін өзгерттік. Ұлттық киноны дамытуға басымдық беріп, процесті анағұрлым ашық еттік. Екінші жыл қатарынан біз осы жаңа ережелер бойынша жұмыс істеп келеміз және атқарылған істе айтарлықтай нәтиже бар.
Ұлттық киноны қолдау мемлекеттік орталығы 2025 жылға ұлттық фильмдер деп тануға үміткер киножобаларды іріктеу үшін басым тақырыптарды бекітті. Мақсат – халқымыздың дәстүрлі құндылықтарын көрсететін, ұлттық мүдемізге, идеологиямызға сай келетін және өзекті мәселелерді көтеретін фильмдер түсіру.
Биыл байқау үш жанр бойынша өткізіледі:
Ойын фильмдері – Отан, отбасы, еңбекқорлық және патриотизм тақырыптарынан бастап балаларға арналған фильмдер, қазақ ертегілерінің анимациясы және ғарыш туралы киноға дейінгі жобалар.
Анимация – ұлттық құндылықтарды, достықты, намыс пен жігер, ата-анаға құрметті насихаттайтын жобалар.
Деректі фильмдер – мемлекет мерейі, ғылымдағы жетістіктер, экология, IT-технологиялар, мәдениет және көрнекті тұлғалар туралы фильмдер.
Сондай-ақ, жас ұрпақтың дүниетанымын қалыптастыруға бағытталған идеологиялық киноға ерекше назар аударамыз.
2025 жылға арналған киножобаларды іріктеу бойынша басым тақырыптар биылғы 5 қаңтарда жарияланды.
Байқаудың ресми ашылуы 5 наурызда өтеді.
Өтінімдерді қабылдау 13 наурызда аяқталып, жобалар сараптамалық кеңеске беріледі. Әр бағыт бойынша жеке комиссия жұмыс істейді.
Барлық кинематографистерді, режиссерлерді және продюсерлерді байқауға қатысуға шақырамын!» деп жазды министр.
