Сұрақ: Діни алауыздықтың себептері неде?
Жауап: Дәстүрлі дін тұрақтылық пен бейбітшілікке үндейді. Адам дінді дұрыс пайымдамай жалған шейх, пір-ұстаздарға еліктеп түрлі жағдайларға кез болады. Мұның салдары діни тұрақсыздыққа соқтырады.
Діни алауыздыққа соқтыратын бірнеше себепті атауға болады:
Діни фанатизм: адамдар өз діни ұстанымын шынайы шындық деп қабылдап, өзге сенімдегілер адасуда, хақ жолда емес деп төзімсіздік танытып жатады. Діни сауатсыздық: адам өз дінінің негіздерін түсінбегендіктен дәстүрлі діни танымдарды қабылдауда немқұрайлық танытады. Дінді сауатсыздық, надандықпен түсініп алауыздық көзқарасқа бой алдырады.
Саясат пен билік мәселесі: Өз діни мүддесі негізінде саясат, биліктің жұмысын сынап шариғат принциптеріне қайшы деп, түрлі діни терминдерді қолданып жағымсыз көзқарастарын білдіреді.
Салт-дәстүр, мәдениет мәселесі: Дін мен салт-дәстүрді сабақтастыра алмай салт, дәстүр, мәдениет дінге жат деп, салт-дәстүрден бездіреді.
Әлеуметтік желілердегі ақпараттар: Әділеттілік, ақиқат, теңдік, хақ жол деген ұрандармен жалған уағызшылар, діни топтар түрлі ақпараттар арқылы адамдардың діни санасын уулап алауыздыққа шақырады.
Дін ұстануда сергек болып, сауаттылықты арттырып тағаттылықты қалыптастыру қажет. Алла Тағала бүлік пен іріткі салуға қатаң тыйым салады. Құран аяттарында: «Бүлік шығару адам өлтіруден де ауыр (күнә)», «Алла бүлік шығарушыларды сүймейді» деген.
Икрам АЙТАЕВ
