Пайғамбарымыз (Алланың салауаты мен сәлемі оған болсын): «Егер адам баласы таңертең рухы байсалды, тәні сау, бір күндік ризығы бар болып оянса, оған бүкіл дүние берілген адам сияқты болады» деген (Бұхари)
Анау жерде соғыс, мынау жерде ылаң, бұлғақ болды деп еститін едік. Сонда фитна өз басыңа келгенде, атам қазақ айтқандай: «Байтал түгіл, бас қайғы болады» деген нақылын ақылыңмен, жан-тәніңмен де түсінеді екенсің.
Араб тілінде «бүлік» деген сөз «фитнәа» деп айтылады. Сол фитна сөзінің шыққан тегі арабшада «алтынды темірден ажырату» процесіне қолданылған екен. Дәл сол сияқты фитнаға еріп, бүлікке түскен қауым болсын, жеке адам болсын, ақ пен қараны ажырата алмай қиналып қалуы ақиқат. Сондықтан Алла Тағала бүлікті айыптап: «(Ел арасында) бүлік туғызу – қан төгуден де ауыр күнә» деген. (Бақара: 191)
Ата-бабамыз аманат еткен жеріміз бен елімізді, тіліміз бен дінімізді қызғыштай қорғау – әр азаматтың міндеті. Белгілі жазушы Дулат Исабеков ағамыздың: «Амандық болсын. Амандық болса, жамандық болмайды» дегеніндей, Алла Тағала халқымызға амандық берсін!
Айтпақшы, Алматы қаласындағы Б.Момышұлы даңғылы бойында салынып жатқан жаңа мешітті «ас-Салам», яғни «Бейбітшілік» мешіті деп атаса, құба-құп болар еді.
Жартқан Иеміз жар болып, әрдайым адал әрі әділ басшылар бұйыртып, халқымызды бүліктен сақтап, мамыражай бейбіт заманымыздан айырмасын!
Қуат ҚАБДОЛДА
