Сұрақ: Кешкі астан кейін ыдыс жуылмай ертеңге қалдырылса, соның кесірінен үйден береке кетуі мүмкін бе?
Жауап: Бұл тақырыпқа қатысты Пайғамбардың (с.ғ.с.) хадисінен тамақтан кейін қолды жуу сияқты, ыдыс-аяқты да кешіктірмей жуудың абзалырақ екенін түсінуге болады: «Тағамның берекесі астан алдын және кейін қолды жууда» (Термези).
Тамақ ішер алдында қолды жуу – қолдағы зиянды нәрселерді, кірді кетірсе, ал астан кейін жуудың мақсаты – қолда қалған тамақ қалдықтары және сол сияқты т.б. заттарды кетіру.
Тағы бір хадисінде пайғамбар (с.ғ.с.): «Кімде-кім қолы тамақ (ет, май) сасыған күйінде ұйықтайтын болса, содан кейін бір нәрсеге ұрынса, өзінен басқасын кінәламасын» (Әбу Дәуіт).
Тамақ қалдықтарын азық қылатын кейбір зиянкестер мен микробтар қолын жумай ұйықтап қалған адамның қолындағы қалдықтармен қоректенеді.
Мүмкіндігінше ыдыс-аяқтарды келесі күнге қалдырмаған дұрыс. Өйткені, ол зиянкестердің, микробтардың және жәндіктердің келуіне, көбеюіне және т.б. ұқсас жағдайларға алып келуі мүмкін. Алайда, ыдыстарды таңға дейін қалдыру күнә болып саналмайды.
Жалғас САДУАХАСҰЛЫ
