Сұрақ: Өмір неге қайғы-қасіретке толы?
Жауап: Өмірде бақыт пен қуаныш та, қайғы мен қасірет те бар, яғни өмірдің сан алуан сәті бар.
Дүние – алма-кезек. Барымен-жоғымен, саулығымен-сырқатымен, өмірімен-өлімімен, қуанышымен-қайғысымен. Түрлі жағдаймен сыналамыз.
Сол үшін «Өмір неге қайғы-қасіретке толы?» – деп айта алмайтынымыз сияқты «Өмір тек жақсылықтан тұрады», – деп те айта алмаймыз. Сол себепті біз: «Әр нәрседе бір қайыр бар. Алла білушірек, Ол бізден қайырлысын біледі», – дей отырып, мүмкіндіктерді жіберіп алмай себеп іздейміз. Мұсылман қандай да бір іс болса, соған сабырлық танытып, шүкіршілік етіп және міндетті түрде Раббыға тәуекел етеді.
Бұған қоса мұсылман адам молшылық және денсаулық пен қуаныштың есебі әлдеқайда қиынырақ екенін есінен шығармауы тиіс.
Өйткені Жаратушы нәсіп еткен әрбір нығметінің есебін міндетті түрде алады. Мүміннен нығметтердің шүкірі мен ақысы сұралатыны жайында «Тәкәсур» сүресінде былай дейді: «Сол күні, (дүниеде берілген) әр нығметтен әлбетте сұраққа тартыласыңдар» (Тәкәсур, 8).
Жалғас САДУАХАСҰЛЫ
