– Құрметті ғалым, мені біраз уақыт мазалап жүрген сұрақ бар еді. Осы мен қай санаттағы адамға жатамын? Дүниелік пе, әлде ақыреттік пе? – деп сұрайды.
Мұндай сұраққа біршама ойланып қалған ғалым:
– Алла Тағаланың мейірімі сонша кең, ол адам баласына өзінің қай санатта жататындығын өзіне ғана мәлім етіп қойған. Басқа адамдар ол жайлы білмейді.
Жауаптың толыққанды түсінбеген Абдулла:
– Мұны қалай түсінуге болады? – деп қайта сұрайды. Сонда ғалым бұл сұрақтың жауабы түсінікті болу үшін Абдуллаға былай деп сұрақ қояды:
– Сізге біреу қомақты ақша алып келіп берді делік, келесі күні сізден бір бейтаныс кедей адам мұқтаждықтан ақша сұрап алдыңызға келетін болса, сіз қайсысына қуанар едіңіз, әлгі ақша берген адамға ма әлде ақша сұрап келген адамға ма?
Абдулла мұндай сұрақты күтпегендіктен үнсіз қалады. Ғалым өз сөзін жалғастыра:
– Егер, кімде-кім оған ақша берушіге қуанатын болса ол дүниелік адам сапына жатқаны. Ал, егер кімде-кім ақша сұрап келген мұқтаж адамға қуанса, онда ол ақыреттік адам қатарына жатады. Себебі, адам табиғаты ол өзі жақсы көретін нәрсені ұсынатын болса соған қуанады. Егер сізге біреу ақша беретін болса ол ақша осы өмірлік қажеттілігіңізді өтеу үшін ғана жарайды, ал егер пақыр адам сізден ақша алатын болса, оның сауабы мәңгілік бақытқа жетелейтін ақыретте беріледі. Сондықтан, ақыретті ойлайтын адамның қатарында болу үшін ақыретке пайдасы бар дүниелерге қызығушылық таныту керек.
Біз ілгерідегі ардақты сахабалардың өмірінен үлгі алуымыз керек. Олардың алдына мұқтаж адамдар келетін болса: «ақыретке тегін сауап жолдаушы адам келді» деп құшағын жайып қуана қарсы алатын, – деді. Ғалымның сөзін ұйып тыңдап отырған Абдулла:
– Менің айтарға еш сөзім жоқ, – деп бір күрсінді. Ғалым сөзін одан әрі өрбітіп былай деді:
– Біз Алланың мейірімінен үміт үзбей ізгі сахабалардың мысалымен өмір сүруіміз керек. Біз сахабаларды толықтай үлгі тұта алмасақ та, мейлінше солар секілді өмір кешуге тырысуымыз керек. Өйткені, жақсылық жасауға тырысудың өзі адам үшін азда болса өмірлік жеңіс болып табылады.
Бәзбіреулер Пайғамбардың (с.ғ.с.) мінезін Айша анамыздан сұрағанда Айша анамыз: «оның мінезі Құран болған» деген еді. Сол сияқты біз адамзаттың асыл тәжісіне айналған пайғамбардың (с.ғ.с.) көрсеткен жолымен жүрсек, бұйырған амалын орындасақ, онда біз ақыреттік адамдар қатарына жататынымыз сөзсіз.
Егер, сізге ішкі сырын айтушы кісі келсе оның мұңын тыңдай біліңіз. Сондай-ақ, егер сізге істеген күнәсына өкінуші келсе оның да сөзіне құлақ асыңыз. Ал, егер сізге мұқтаж адам келсе оның мұқтаждығын жағдайыңыз келгенше өтеп беріңіз. Шын мәнінде ардақты пайғамбардың (с.ғ.с.) айтылған Құран мінезі осындай игі амалдармен ұштасқан еді. Сондықтан, Құран ол адамның қолында (кітап күйінде) болуы маңызды емес Құран ол адамның мінез-құлқында болуы аса маңызды.
Адамдармен қарым-қатынас жасауда қашанда ізгілік танытуға ұмтылыңыз. Адамдар сізді көргенде іштері жылитындай дәрежеде байланыс орнатсаңыз онда сіз бұл өмірде ең бақытты жандар, яғни, мәңгіліктің мәуелі бақтарында ғұмыр кешетін ақыреттік адам қатарында екеніңізді білесіз. Мұндай дәрежеге адамды ең алдымен жүректің саф тазалығы жетелейді. Себебі, Алла Тағала өзінің таңдаулы құлдарына ғана таза жүрек беріп қояды.
Жалғас АСХАТҰЛЫ,
дінтанушы
