Қазақ – бағзы заманнан бері болмысынан бейбітсүйгіш халық. Бұл – қанға сіңген қасиеттеріміздің бірі. Өмір сүру қағидамыздың біріне айналған бұл қасиет Ислам дінін жүрек қалауымен қабылдаған халқымыздың болмыс-бітімін көркейте түсті.
Қазақ халқының әлем жұртшылығын тұрақтылық пен достыққа үндеуі табиғи құбылыс еді. Екі мыңыншы жылдардың басында Қазақстанның бастамасымен шақырылған Әлемдік және дәстүрлі дін лидерлері съезі бірте-бірте жаһандық сипат алып, адамзатты алаңдатқан мәселелерді талқылау алаңына айналды.
Бүгінде Қазақ елі келіссөздер мен бейбіт мәміленің ордасына айналды. Біз халықаралық алаңда орын алған қақтығыстарды бейбіт жолмен шешуге ықпал етіп келеміз. Бұл қадамымызды әлемнің жетекші мемлекеттері мойындап отыр.
Алла қаласа, алдағы қыркүйек айында Нұр-Сұлтан қаласында Әлемдік және дәстүрлі діндер лидерлері съезінің кезекті отырысы өтпек. Аталған халықаралық жиын пандемиядан кейінгі кезеңде адамзаттың әлеуметтік-рухани дамуындағы әлемдік және дәстүрлі діндер лидерлерінің рөлі кеңінен талқыланбақ. Бұл – асыл дініміз Исламды терроризммен байланыстыру түбегейлі қате ұғым екенін тағы да әлемге паш ететін айтулы жиын.
Біз экстремизм мен терроризмнің дінге, ұлтқа, нәсілге бөлінбейтінін ұмытпауымыз керек. Алайда, адами құндылықтарды мойындамайтын экстремистер бүкіл әлемге қауіп төндіруде. Олардың озбырлық әрекетінен мұсылмандар да зиян шегуде.
Ислам діні – бейбітшілік, амандық деген ұғымдарды білдіреді. Алла Тағаланың Өзінің соңғы елшісін жіберудегі мақсаты қасиетті Құранның «Әнбия» сүресінің 107-аятында былайша баяндалады: «Біз сені әлемдерге тек рақым етіп қана жібердік».
Исламды терроризммен байланыстыру – асыл дінімізге жасалған үлкен қиянат. Жаратушы Иеміз «Ағраф» сүресінде: «Жер бетінде тыныштық орнағаннан кейін бүлік жасамаңдар» деп қатаң ескертеді.
Өйткені, Ислам діні барлық адамды тегіне, нәсіліне, дініне, ұлтына қарамастан бірлікке шақырады. Ардақты Пайғамбарымыз Мұхаммедтің (оған Аланың салауаты мен сәлемі болсын) мүбәрак хадисінде: «Ей, адамдар! Естеріңде болсын! Раббыларың біреу, ешбір араб араб еместен, араб емес арабтан, ақтың қарадан, қараның ақтан діндарлығынан басқа ешқандай артықшылығы жоқ. Күмәнсіз, Алланың алдында ең мәртебелілерің – тақуа болғандарың» делінген.
Қазақ жеріне Ислам дінін таратушылардың бірі Қожа Ахмет Ясауи бабамыз елдің кемелдік пен еркіндікке жетуі үшін бірінші шарт ретінде «заман» екенін атаған. Заманның мазмұны – тыныштық. Ғұлама бабамыздың тұжырымы бойынша, екінші шарт: «макан». Маканның мазмұны – Отан. Отансыз еркіндіктің де, тыныштықтың да мәні жоқ. Үшінші шарт – «ихуан», яғни бауырмалдық. «Бір Отанда, бір уақытта тіршілік етіп жатқан адамдардың арасында өзара туыстық, бауырмалдық болмаса, бәрі бос» дейді ғұлама.
Әлемдік бейбітшілікті қамтамасыз етіп, бірлігіміз бен діни татулығымызды нығайту – әрбір азаматтың асыл борышы деп санаймыз. Қазақстан мұсылмандары діни басқармасы да халықты үнемі ізгілік пен бірлікке үндеп келеді. Жыл басында Бас мүфти Наурызбай қажы Тағанұлының бастамасымен 2022 жыл дін қызметкерлері үшін «Ислам – ынтымақ пен бірлік діні» жылы деп жарияланды. Бұл шешім еліміздің тұрақтылығы мен тыныштығын нығайтуға оң ықпал етіп келеді.
Алла Тағала елімізді, жерімізді, бүкіл әлемді біреудің озбырлық әрекетінен, бүлігінен сақтағай! Әмин!
Өмірзақ қажы ҚАЗКЕНҰЛЫ,
Қарағанды облысының бас имамы
