Танымал боксшы Жәнібек Әлімханұлы әлеуметтік желіде өзінің жолын қуған жас спортшыларға аға ретіндегі ақыл-кеңесін айтты.
“Спортшы інілер! Біріңе жасы үлкен ағамын, енді біріңе еліктейтін спортшымын. Маған көптеген хаттар келеді. Аға сіз сияқты болғымыз келеді, мен де болашақта сіз сияқты тарих жасаймын деген інілер өте көп. Көп болғандарыңызға рақмет. Аға боп, әлем чемпионы болып інілерге дұрыс үлгі көрсете алмасақ, керек кеңес айта алмасақ бізге сын.
1. Ешқашан атақ қумаңдар. Жылт етіп көрініп қалайын, спортшымын ғой ортада еленейін, мені байқасын деген ойдан аулақ болыңдар. Сұрап алған, жалынып жинаған танымалдық жақсылық емес.
2. Орталарыңды дұрыстаңдар. Айналаңда саған сенетін, арманыңды қанаттандыратын адамдар болсын. Спортшы да көп адам сияқты шаршайды. Темір емессіңдер. Қайғырасың, уайымдайсың. Спортқа қолыңды бір сілтегің келетін кездер болады. Сол сәтте жігерлендіретін достарыңды қазірден бастап тауып қойыңдар. Ортаң ол командаң. Командаң мықты болса алынбас қамал болмайды.
3. Тәртіп. Режим. Дұрыс тамақтануды қолға алыңдар. Көп нәрсе дұрыс тамақтанудан болады. Дұрыс тамақ ол дұрыс жаттығу. Ал дұрыс жаттығу ол жеңістің жартысы.
4. Кітап оқыңдар. Спортшы дұрыс сөйлей де алу керек. Дұрыс сөйлеу деген дұрыс әңгіме айту деген сөз. Мүмкіндігінше тарихи кітаптарға көңіл бөліңдер! Тарихта талай тәжірибе бар. Төрде отырып алып прикол айтатын спортшы болудан сақтаныңдар. Есті сөз дастарқан көркі.
5. Ізденуді тоқтатпаңдар. Ютубта қазір бәрі бар. Спорт ғылымиланып кеткен. Қиналып жаттығу жасауды қойып, дұрыс жаттығу жасауға көшіңдер. Түрлі жарақаттар дұрыс жаттықпағаннан болады.
6. От болыңдар. Әр жаттығуларыңнан әр сездеріңнен жігер мен намыс көрініп тұрсын. Әр қадамдарыңнан сол байқалсын. От бол от болмасаң жоқ бол дейді қазақ.
7. Спорт деп ата-ананы, бала-шағаны, аяулы жарды ұмытып кетуге болмайды. Барлығына уақыт табу керек. Өмірің залда өтіп кетпесін. Көршіні, ағайынды естен шығармаңдар. Үлкендерден бата алып жүріңдер!
8. Сеніңдер. Ойыңды жүзеге асыра алатыныңа сен. Америкаға келіп көк туды желбіре алатыныңа сен. Чемпион бола алатыныңа күмәнданба! Күмән деген тұсау.
Сәттілік, інім! Шын ниетпен, Жәнібек ағаң!
