Атырау қаласы әкімдігінің ішкі саясат бөлімінің қолдауымен және «Әлеуметтік бағдарламалар орталығы» қоғамдық қорының ұйымдастыруымен «Бірлік – біздің күшіміз» атты ұлттық спорт түрлері мен зияткерлік сайыс өтті.
Шараға мешіт жамағаттары белсене қатысып, бірлік пен ынтымақтың жарқын үлгісін көрсетті. Жарыс барысында қатысушылар асық ату, ләңгі тебу, тоғызқұмалақ, садақ ату сияқты ұлттық ойындардан сынға түсіп, «DASTUR QUIZ» атты зияткерлік сайыста дін, тарих, ұлттық құндылықтар және заманауи тақырыптар бойынша білімдерін ортаға салды.
Нәтижесінде тоғызқұмалақтан Шораев Дастан, садақ атудан Ербөлек Бейбарыс, асық атудан Өтегенов Айсұлтан, ләңгі тебуден Шерхан Еңсегенұлы топ жарды. Футболдан «Еркінқала», зияткерлік сайыстан «Сәруар» командалары жеңімпаз атанды. Жеңімпаздарға 30 000-нан 100 000 теңгеге дейін қаржылай сыйлықтар табысталып, диплом және Алғыс хаттармен марапатталды.
Аталған игі шара – ұлттық құндылықтарды дәріптеуге, салауатты өмір салтын насихаттауға және конфессияаралық татулықты нығайтуға бағытталған маңызды қадам ретінде бағаланды.
