Сұрақ: Тозаққа түсіп, кейін жәннатқа кірген адамның қандай да бір белгісі бола ма?
Жауап: Иә, Пайғамбардың (с.ғ.с.) айтуы бойынша, тозақта белгілі бір уақыт болып, ол жақтан шығарылғаннан кейін адамдардың жүздері қызыл түске жақын, түнерген бір түсте болады екен. Бұл олардың дүниеде істеген күнәларына байланысты. Сол себептен жұмақтықтар оларға «ұзақ уақыт тозақта болғандар» мағынасына сәйкес келетін «жәһәннәмиун» деп атайды. (Бұһари 6559, Таухид 7450)
Алла елшісінің (с.ғ.с.) бізге жеткізуі бойынша, әрбір пайғамбардың Алланың алдында қабыл болатын бір дұғасы бар. Кейбір пайғамбарлар бұл дұғаларын осы дүниеде дұға қылып қойған. Ал пайғамбар (с.ғ.с.) бұл дұғасын ақыретке, үмбетіне шапағатшы болу үшін сақтаған. (Мүслим 338, 339; Термези 3602 және т.б.)
Неге бұлай жасады деп ойлайсыз? Өйткені, ақыреттегі машақат пен қиындық – бұл дүниеден өзгеше ауыр болмақ. Бұларды салыстыру мүмкін емес. Пайғамбар (с.ғ.с.) үмбетін қатты жақсы көреді. Сол себепті үмбетіне шапағатшы болу үшін сақтаған. Әсіресе, өзінің күнәһар үмбетіне жарылқау сұрайтыны жайында да хабар берген. (Әбу Дәуіт 4739; Термези, 2435 және т.б.)
Жалғас САДУАХАСҰЛЫ
