Иә, дұрыс айтасыз. Мұрынға тамызылған дәрі ауыз қуысы, өңеш арқылы өтіп асқазанға баратындықтан фиқһ кітаптарында мұрынға дәрі тамызудың оразаны бұзатындығына қатысты пәтуалардың бар екені рас. Көпшілік ғалымдар Пайғамбарымыздың (с.а.с.) «Дәретте мұрынға суды қаттырақ тартыңдар. Бірақ оразада олай істемеңдер (қатты тартпаңдар)» [Термези, Әбу Дәуіт, Ахмад],– деген хадисіне жүгіне отырып, мұрын арқылы судың ішке кетіп қалуы мүмкін болғандықтан, мұрынға тамызатын дәрілердің оразаны бұзатындығын айтқан. Бұл – мейлінше сақ болудан туындаған көзқарас. Мұндай жағдайда дәріні ауызашардан кейінге қалдыру, оның орнына ине салғызу немесе ораза ұстамау секілді шешу жолдары ұсынылуда.
Қазіргі таңда дәрігерлердің анықтағанындай мұрынға тымызылатын дәрінің бір тамшысы шамамен 0,06 cm3 екен. Оның бір бөлігі мұрын қуысында сіңіп, жұтылып кететіндіктен асқазанға өте аз мөлшері ғана кетуді. Ал бұл өз кезегінде ауыз бен мұрынды шайған кездегідей көлемде ғана болатындықтан, Түркияның Діни басқармасы бұған рұқсат берген екен. Қараңыз:http://www2.diyanet.gov.tr/dinisleriyuksekkurulu/Sayfalar/HaberDetay.aspx?rid=1&lst=DuyurularListesi.
Менің ойымша да осы пікірді алған дұрыс секілді. Өйткені, тыныс алу жолдары бітеліп қалатын аллергиясы бар адамдардың кешке дейін шыдаулары өте қиын. Сонымен қатар дәрігерлердің айтуынша аллергияға қарсы ине аллергия маусымы басталып кеткен кезде салынбайды. Өйткені оны ерте бастан анықтап, бір-ақ рет салуға болады. Ал аллергиясы бар адам «ораза ұстамай-ақ, кейін қазасын өтесін» дейтіндей аллергия денсаулыққа қатты қауіп төндіретін, ораза ұстамауға рұқсат етілетін ауыр науқастардың қатарына жатпайды. Неге десеңіз мұрынға бір-екі тамшы тамызғаннан кейін тыныс алу жолдары тез ашылатындықтан, ораза ұстауға ешқандай кедергі келтірмейді. Қазіргі таңда экологияның нашарлығы мен адам иммунитетінің төмендеуі салдарынан аллергияға шалдыққан адамдардың саны өте көп. Сондықтан мұндай адамдарды ораза айының берекесінен мақұрым қалдырмаған абзал.
